Riminiscenze
Caru cumpari, si vi ricuddati
C’era na villa chiamata Scialè
Unni li missinisi, ‘nta l’estati,
Puttavunu a giucari li bebé.
Li mammi sutta l’abbiri ssittati
Travagghiavanu a lu frivolitè.
Mentri li figghi eranu ‘mpignati
Cu la canzuna di Madam Doré.
Poi comu tuttu accadi a stu paisi
Ci fu quaccunu chi pinsò alla fera
E la comunità pagò li spisi.
Cumpari Vanni, è vecchia la manera,
Sta città sta murennu d’emottisi
E non putemu diri mancu spera.
Giovanni Filocamo
Santacruci
Caru cumpari, cu nu capputtazzu
I militari, fossi raccattatu
‘Nta la munnizza, un cettu povarazzu
Girava pi li strati, trasandatu
Cu na gran barba.Spissu i nu cudazzu
Di vastasuni iddh’era ssicutatu.
Cu lu bastuni allura :”Iò v’ammazzu”
Vuciava, fotti fotti, u svinturatu.
Di nomu si chiamava Santacruci,
Pidocchia inveci a ‘nciuria era di sè
E chista era soltantu la sua cruci!
Cumpari Vanni, non ci fu e non c’è,
Unu chi dissi seriu a tutta vuci,
Sinu alla motti sempri :<Viva u re>.
Giovanni Filocamo |
I “Du soru ”
Caru cumpari, ‘nta strata du Daziu
C’era na speci i piccula putia,
Ma puru ‘nta strittura c’era spaziu
Pi tuttu chiddhu , ch’ a genti sibbia.
I tacci si cumprava don Araziu,
U zoru, inveci, a signura Lucia.
E u ibbusu? Signuri, iò vi ringraziu
Pi ‘ntuppari puttusa a chicchessia.
Non c’era ‘nzigna ma tutti i “I DU SORU”
Sapivunu truvari i jornu o sira
Quannu ci bisugnava soda o boru.
Cumpari Vanni,insomma, stira stira
Mi pari ddhà mancassi sulu u storu,
Ma si ccattava sulu cu na lira.
Giovanni Filocamo
_______________
Punta Stilo
La guerra incominciata era da pocu
E a nui pariva essiri luntana.
Inveci senti un po’ chi giocu i focu,
Veniri vessu a costa siciliana.
“ Si spara a nu bissagliu in cacchi locu:
Eccu picchì si senti sta buriana!”
Inveci era nu scontru non dappocu
Da flotta ngrisi contro l’italiana.
Pi tuttu u jornu li nostri vitrati
Trimarunu a ogni salva di cannuni.
Ma a sira quannu i nostri curazzati
Traseru in pottu fu na prucissiuni
Di motti, di firiti e di bruciati
Chi nuddu ca pò fari un paraguni.
Giovanni Filocamo |
|
Luisa Ardizzone 